رواد الأعمال خاصهم يعرفوا بأن الناس مبقاتش كتشري شي منتج غير على قبل #الثمن أولا على قبل #القيمة_المضافة بالمعنى ديالها الاقتصادي
سنين هادي بدا واحد العالم و العالم هو الله في دراسة العلاقة ما بين البيزنس و علم النفس ، و هاد السيد خدا جائزة نوبل. و من تما بداو خوتنا في الله منين يطرحوا أي منتج او خدمة للبيع كيحاولو يركزو على هاد العلاقة لي كتربط البيزنس بعلم النفس .
و بداو كيطبقو هاد شي على أي حاجة خاصة بالمنتج من اللون حتى لومبلاج حتى الاشهار حتى و neuro marketing خرجو لينا بشي فهامات جداد غيرات من مفهوم البيزنس و القيمة المضافة.
قاليك آ سيدي راه تنتعاملو مع #البشر، لي هما مجموعة من #الأحاسيس و لي الذماغ ديالهم مقسم لزوج ديال الطبقات،
الأولى و هي طبقة #كسولة ما كتبغيش تفكر و هي لي كنستعملوها بزاف باش ناخدو القرارت ديالنا ،خصوصا في عملية الشراء . الطبقة الثانية هي #المجتهدة و لي كتفكر بزاف و تتجيب حريق الراس ،و هاد الطبقة مكيبغيش الإنسان يستعملها غير قليل بزاف. و بما أن هاد الإنسان كتلة ديال الأحاسيس فدائما الشركات تتربط المنتج ديالها مع قيمة #Emotional , و بما أننا حنا المغاربة كندفكو بالاحاسيس، فالقضية ساهلة باش تبيع ليهم العجل، حيث تنستعملو الجهة الكسولة من #الذماغ.
إلى تفرجتي على اشهار The Coca-Cola Company تيقولوليك ” دوق اللحظة ” و تيبانو ليك ديما الناس ناشطين و معرسين، و الذماغ الكاسول تيربط مباشرة مابين كوكا و النشاط هاهو شاط، واخا ما كاينة حتى علاقة مابين كوكا و النشاط. و هاد شي تيطبقوه جميع الشركات حتى دياولنا، و إلى ما تيقتونيش شوفو غير إقامة السعادة، مدرسة النجاح، كلينيك الشفاء, مقهى المنظر الجميل و انتوما غاديين
المهم ، منين تجي تبدا شي مشروع فكر مزيان في هاد القيمة لي كتقيس الأحاسيس و لي مزيان تربطها مع المنتج أو الخذمة ديالك
يتبع أن كان في العمر بقية ، للحديث عن مجموعة أخرى من القيمة المضافة .
Mohamed EL Fezzazi ✪✪ ( محمد الفزازي )
