علاش مهم جدا تحدد #الاهداف ديالك في الحياة بشكل #شخصي ؟
لأنه على حسب الاهداف ديالك غادي تحط خارطة طريق ديال #المهارات لي خاصك تتعلمها باش تحقق ذاتك و اهدافك
تيعني انه كاينين مهارات خاصنا كاملين نتعلموهم مهما كانت الاهداف ديالنا لأنها صالحة لينا مهما اختلفت اهدافنا و هي لي تيسميوها . و كاينين مهارات خاصك انت تختارهم و تتعلمهم و تطورهم حسب اهدافك او أهداف #المقاولة ديالك
يعني متكونش ضارباك تلفة و تتعلم أي حاجة سمعتيها او لقيتيها حداك ، لانك غادي تصبح سبع صنايع و الرزق بيد الله, و لكن غادي تبقى تدور غير في بلاصتك حتى تسالى ليك الحجرة .
الى كان الهدف ديالك هو تعيش وسط الصحراء ، علاش غادي تتعلم السباحة ؟ و تبقى تضيع الوقت في تعليم السباحة لانك قريتي اولا شي واحد قالك راه الصحراء غادية تولي واحد النهار بحر ! . بقا تتسنى في الصحراء حتى تولي بحر .
صديقي ،
صديقي ماشي بالضرورة تتبع الموجة، كلشي باغي يطير ، و تتعلم مهارات الطيران و التحليق و يقدمو ليك انك الى ما طرتيش راك فاشل ! .
راه الألماس و الذهب و المعادن النفيسة كاينة تحت الأرض ماشي في السما ، و باش توصل ليها خاصك مهارات ما عندها حتى علاقة بالطيران و التحليق ، راه خاصها مهارات التنقيب و الحفير و الدمير و الصبر على انخفاض الاوكسجين و…
بخلاصة ، حدد أهدافك واش في السما اولا في الما اولا تحت الارض ، و هي لي غادي تحدد ليك المهارات لي خاصك تتعلم باش تحقق اهدافك . و هادشي غير باش ما تنساش أن التوفيق من عند #الله .
Mohamed EL Fezzazi ✪✪ ( محمد الفزازي )
