كاينة واحد الخدعة سينمائية تتكرر بزاف ديال المرات في مجال ريادة الاعمال و المشاريع. شي حاجة من نوع ديال
C’est déjà vu
منين شي واحد تيطلق شي مشروع، غالبا في النهار الاول أو الاسبوع الاول او حتى الشهر الاول ، تيتكبو عليه الكليان او عدد زوار الموقع بحال الشتا . و تيبقا خونا في الله مول المشروع تيضحك حتى كيبانولو الضراس، و يبدا يظن انه طاح على مغارة علي بابا.
و لكن غير تدوز هاد سبع يام ديال الباكور و تيبقى غير الريح ! هادوك الكليان كيختافيو من الشاشة ! هاد النوع ديال الكليان هما أخطر نوع ‘ و تيتسماو :
بحيث هاد النوع فيه اقسام :
1. كاين داك النوع ديال فين ما كانت الهدية دايزة في شي درب راه تابعها ، يعني غير يسمع شي مشروع ‘ او Application، او محل جديد تحل’ حتى كتلقاه هو الأول لي خاصو يشوف و يقدر يجرب ، باش يدي التبركيكية الصحيحة ، شحال من قالب ديال السكار جابو و الثور شحال فعمرو و الغياطة واش واعرين … هاد النوع واخا ماغديش يرجع و لكن يقدر الى هداه الله يدير ليك إشهار مزيان للمشروع و يقدر الى ما تهليتيش فيه يريب ليك الحفلة ، لانه يبقا غادي و ينتاقد ‘ شبعنا غير شطيح و لكن حتى كاس اتاي معطاوه لينا …
إذن خاصك تكون موجد راسك لهاد النوع و تدير ليه استراتيجية باش يهدر مزيان على المشروع.
2. كاين داك النوع ديال ” واش عندك النعناع ” ‘ يعني يجي غير يدرب دويرة ف او المحل و يعمر عليك السوق و ما يشري حتى حاجة .
3. كاين داك النوع لي غير بدات الشتا كتطيح و دخل يتخبا. تيدرب دويرة حتى توقف و يخرج .
4. كاين داك النوع لي تيتسنا في شي وحدة تعطلات عليه ، تيدخل يضرب دويرة بين ما تجي .
5. كاين واحد النوع ديال هاديك لي كتجمع عيالات الدرب كاملين و ينزلو في الطوبيس من الحي حتى باب مراكش غير باش يشوفو ولد حليمة فتح محل في باب مراكش ، باش يقولو ليه راحنا عقنا بيك فتحتي محل جديد.
6. …….
المهم الغاية من هذه الامثلة هو ان هاد النوع ديال الكليان لي يقدر يكون بحال الشتا في الايام الاولى، راه تيزور الموقع او المحل و يقدر يشري لأسباب لا علاقة لها بالقيمة المضافة او needs أو اي حاجة لوجيك.
و المغزى هو ما تفرحش بعدد زوار الموقع او زوار المحل، او ارقام المبيعات لي تحققهم في الايام الاولى لإنطلاق المشروع . و الاحصائيات تتقول أنك خاصك تاخد في الحسبان 5% فقط من هدا النوع ديال الزبناء و لي تقدر تعتابرهم مهتمين بصح بالمنتج او الخذمة و لي يقدروا يرجعوا .
يعني ؟ يعني آسيدي نجاح المشروع تيطلب تفيق دغية من هاد أحلام اليقظة ديال الايام الاولى ، و تدير مجهود كبير باش ترد هاد النوع ديال الكليان من لكليان دائم و وفي . و تدير مجهود استراتيجي باش تجلب زبناء حقيقيين محتاجين للمنتج او الخذمة و للقيمة المضافة ديالك و عندهوم الامكانيات المادية باش يدفعو المقابل .
Mohamed El Fezzazi- Think Tank ✪✪ ( محمد الفزازي )
