بعد سنوات من الدراسة و التخرج، كتصدم بأن هاد القيامة كاملة و هاد السنوات كانت من أجل كنصب شغل ،لي غادي يمكنك من ذخل محدود ربما يبقيك على قيد الحياة، لان المناصب لي على بالك عندها مواليها لي متيفرطوش لأولادهم و احبابهم فيها.
المهم هذا ماشي هو موضوعنا.
الشباب من بعد متتبدا تقتلوا البطالة و يعيا من كلسة القهاوي و راس الدرب. تيبدا ينسى كل ما قرا في حياتو ، و يمكن ينسى حتى من آشمن جامعة او مؤسسة تخرج، و كينسى مجبرا جميع الوعود لي قدم لحب حياتو باش يتزوجها من بعد التخرج. و شوية شوية تيبداو يخرجو شي شعرات بويض في الراس
حتى تايجي واحد النهار، و بلا مقدمات ، تيجيو عندو موالين الدار، لي هو عايش معاهم من زمان و كابر معاهم و تيتفكروه فجأة انه باقي حي ،و يقولوليه هاديك الجملة الشهيرة :
” آش باقي كتسنا نوض تزوج، حنا نعاونوك”
السيد متيعرفش باش تبلى، تيبدا يقول ليهم ” واش غير آجي و تزوج ” ، كيبداو عليه غير دير النية ،شوف فلان و علان ، المهم تيبداو يبينو ليه ان الزواج في حد ذاتو هو النجاح ، و إلى تزوج راه حقق المستحيل ، تيبدا يخبرهم ” أودي فين غادي نسكن” ، تيجاوبوه اودي بدا غير ب و سكن معانا حتى يسهل عليك الله . تيدوز ليهم من سؤال لسؤال ، منين نجيب المصروف ؟ ، كيقولولو جيب غير ديال المقاول الذاتي ، مبني على ” وايلي حتى نتا خمسين درهم تفوتكم لهيه ” المهم في الأخير كيقنعووووووه.
تيدوز الشهر الاول تيلقى راسو تزوج وحدة ختاروها ليه لانهم هما لي تيدوزوا الدوسي ، فما عندوش الحق يختار على حسب الشغف ديالو و لكن حسب لي كيمولو هما . من بعد ثلاثة اشهر تتحمل الزوجة و تيبداو يقولوليك سالات الدوميسيلياسيون ، دبا خاصك تخرج تكري ، تيبداو مصاريف ماكانتش في , تتلقى راسك دخلت لهاد المعمة بلا خبرة على الزواج ،على المشاركة ، على تربية الأسرة على مواجهة الحياة ،على … فتنتهي بالالتحاق بالاف حالات الطلاق و الأسر المدمرة.
هاد المثال البسيط هو لي تدير الدولة من خلال البرامج ديال تشجيع المقاولة، كتكون بطالي مع راسك حتى كتسمع الدولة تتقوليك
مالك آ صاحبي مازال ما بغيتيش تولي مقاول، حنا نعاونوك!
ما بين عشية و ضحاها تدير copy past. لواحد business model و تتوكل على الله و نتا ما سامع ما شايف ، تيردو ليك كما يقول الاخوة في مصر البحر طحينة، تيعطيوك جوج ريالات متقدكش حتى في الكرا و Formation ديال كيف تصبح مقاولا في يومين ، و يطلقوك تعوم في البحر .
و من بعد ثلاثة اشهر تتلقى راسك وسط بحر ، لا نتى عارف تعوم و لا نتا بقيتي على الشط . و ربما تلقى راسك متابع من الفوق .
ريادة الأعمال ماشي مجال ديال الناس لي لا يتوفرون على الحد الأدنى من الأهداف و العلم و الرؤية و المهارات و حب الابتكار ، و فهم جيد لميكانيزمات السوق و التسيير و التدبير و …و…و… نجاح برامج المقاولة مثل الزواج ، يجب أن تتوجه للموهوبين و المأهلين تأهيل عالي و يقدم لهم الدعم الحقيقي ماشي زوج ريالات ، لأن هؤولاء إن توفرت لهم الظروف المناسبة ، سيخلقون مقاولات حقيقية كبرى تمكنهم من خلق مناصب شغل للخريجين ، مما سيمكنهم بدورهم من التعلم و أخذ التجربة و بعد ذلك يستطيعون خلق مقاولاتهم .
خاص يجمع راسو باش نديرو ليه مقاولة ، ماشي نديرو ليه مقاولة باش يجمع راسو .
غير ذلك ، غادي نبقاو من برنامج لبرنامج و من خسران لخسران و من طلاق لطلاق ، حتى يولي كلشي حامل صفة مطلق عوض صفة رائد اعمال .
عقلو على هاد التدوينة مزيان .
Mohamed El Fezzazi- Think Tank ✪✪ ( محمد الفزازي )
